Fisnik Asllani nuk do ta kompletojë transferimin te RB Leipzig, pavarësisht se klubi gjerman kishte arritur marrëveshje me Hoffenheimin dhe sulmuesin shqiptar. Operacioni prej 25 milionë eurosh, që me bonuse mund të arrinte deri në 30 milionë euro, u anulua pasi Asllani nuk e kaloi me sukses kontrollin mjekësor. 23-vjeçari, i cili sezonin e kaluar shënoi 11 gola dhe regjistroi 8 asistime në 35 paraqitje, mbetet kështu pjesë e Hoffenheimit, ndërsa ende nuk janë bërë të ditura detajet e problemit të evidentuar gjatë ekzaminimeve.

Dështimi i marrëveshjes me Leipzigun ka rihapur garën për Asllanin. Barcelona, e cila e ka monitoruar sulmuesin gjatë kësaj vere dhe ndaj së cilës ai ka shfaqur publikisht admirim, mund të rikthehet në skenë, ndërsa interesim ka pasur edhe nga Borussia Dortmundi. E ardhmja e shqiptarit pritet të përcaktohet nga vendimet e këtyre klubeve dhe nga kushtet që do të vendosë Hoffenheimi për një transferim të mundshëm.