Sipas parashikimeve më të fundit sezonale të publikuara nga Severe Weather Europe, Evropa po hyn në një verë me kushte atmosferike jashtë normales. Modelet globale sinjalizojnë një verë të nxehtë, të thatë dhe me potencial për ekstreme klimatike – sidomos gjatë muajve korrik dhe gusht.

Pranvera meteorologjike e vitit 2025 (mars-maj) u karakterizua nga presione të larta atmosferike që dominuan pjesën veriperëndimore të kontinentit, duke rezultuar në më pak reshje dhe temperatura mbi mesataren në shumë zona. Reshje më të dendura u regjistruan në jugperëndim, ndërsa pjesa tjetër e kontinentit u përball me thatësirë të theksuar.

Në fund të pranverës, parashikimet nga ECMWF tregojnë për një kalim të paqëndrueshëm me prani të cikloneve dhe reshjeve të dendura në disa zona – por kjo gjendje nuk pritet të zgjasë. Qershori sjell një hyrje të butë në verë, por që shumë shpejt do të pasohet nga temperatura të larta dhe kushte të thata, sidomos në Evropën perëndimore, jugore dhe qendrore.

Muajt korrik dhe gusht pritet të karakterizohen nga dominimi i një anticikloni të fuqishëm, i cili do të shtyjë ciklonet drejt veriut dhe do të lërë shumicën e kontinentit nën ajër të thatë dhe të ngrohtë. Kjo do të sjellë rritje të rrezikut për valë të nxehtësisë, thatësira të zgjatura, ndikim në bujqësi dhe rrezik për shëndetin publik.

Parashikimet e konfirmuara edhe nga modelet britanike dhe kanadeze (UKMO dhe CANSIPS) mbështesin këtë pamje: një verë jashtëzakonisht e nxehtë dhe e thatë, me reshje të kufizuara dhe kushte jo të favorshme për shumicën e Evropës.

Ekspertët rekomandojnë që qytetarët dhe autoritetet të përgatiten për ndikime të mundshme në furnizimin me ujë, energji, dhe sektorin e bujqësisë, si dhe të kenë kujdes ndaj rreziqeve që lidhen me nxehtësinë ekstreme.