20 Maji – Dita Botërore e Metrologjisë

Të Tjera | 20.05.2025 Ora 8:38

Çdo vit më 20 maj, komuniteti shkencor në mbarë botën shënon Ditën Botërore të Metrologjisë, në nder të nënshkrimit të Konventës së Metrit që ndodhi më 20 maj 1875. Në atë kohë, 17 shtete themeluan bazën për bashkëpunim global në fushën e matjes shkencore.

Qëllimi kryesor i kësaj konvente ishte krijimi i një sistemi të unifikuar matës që do t’i ndihmonte shkencëtarët dhe inxhinierët të bashkëpunojnë me saktësi, pavarësisht prejardhjes së tyre. Ky sistem, që sot e njohim si Sistemi Ndërkombëtar i Njësive (SI), është baza që mundëson zhvillime shkencore dhe teknologjike në të gjithë botën.

Nga matja e barnave në laboratorë, te ndërtimi i satelitëve dhe pajisjeve teknologjike, ndikimi i kësaj marrëveshjeje historike është i pranishëm kudo. Dita Botërore e Metrologjisë është kujtesë e rëndësisë që kanë standardet e përbashkëta në një botë të globalizuar.