Adea Vllasaliu mbajti koncertin e saj të parë solo më 14 dhjetor 2024 në Fakultetin e Muzikës në Prishtinë. Ky event muzikor, që tërhoqi vëmendjen e dashamirësve të muzikës klasike, prezantoi vepra nga kompozitorë të njohur si Scarlatti, Schumann, Brahms, Haydn, Bellini, Gluck, Mozart, Bizet, Verdi, Puccini dhe shumë të tjerë.
 
Adea, studente e vitit të dytë në Fakultetin e Arteve, interpretoi këto krijime të mrekullueshme, e shoqëruar nga sopranoja Lorita Mehmeti dhe koropetitori Agron Shujaku. Koncerti, që u mbikëqyr nga Profesoresha Merita Juniku, filloi në orën 17:00 në Sallën Koncertale të Fakultetit të Muzikës.
 
Rrugëtimi i Adeas në botën e muzikës ka nisur që në fëmijëri, kur ajo mori pjesë në festivale dhe paraqitje të ndryshme artistike. Pasioni i saj për muzikën klasike dhe operën ka qenë i pashuar, dhe tani ajo e vazhdon këtë udhëtim të mrekullueshëm përmes studimeve të thelluara në Fakultetin e Muzikës.

Ky koncert shënoi një moment kyç në karrierën e saj muzikore dhe ofroi një mundësi të shkëlqyer për të ndarë me publikun talentin dhe pasionin e saj të jashtëzakonshëm.