Rezervat e gjakut mbeten jetike për trajtimin e pacientëve, ndërsa aksionet për dhurim po shtohen në të gjithë vendin. Kësaj nisme i është bashkuar edhe Forca e Sigurisë së Kosovës, duke kontribuar me dhurues vullnetarë dhe duke nxitur qytetarët për solidaritet.

Nga Qendra Kombëtare e Kosovës për Transfuzionin e Gjakut bëhet e ditur se rezervat aktualisht janë stabile, por kërkesat për produkte të gjakut janë dinamike dhe ndryshojnë në varësi të nevojave të klinikave.

Sipas këtij institucioni, më të rralla mbeten grupet e gjakut me Rh negativ, për shkak të përqindjes më të ulët të dhuruesve në popullatë.

Përfaqësuesit shëndetësorë theksojnë se dhurimi i gjakut duhet të kthehet në praktikë të rregullt, duke e konsideruar si një akt të rëndësishëm solidariteti që ndihmon në shpëtimin e jetëve.