Edicioni i gjashtë i Festivalit Ndërkombëtar të Filmit Red Sea është shtyrë për vitin 2027.

Festivali ishte planifikuar të mbahej nga 3 deri më 12 dhjetor 2026 në Jeddah të Arabisë Saudite, por organizatorët kanë njoftuar se ngjarja do të zhvendoset në tremujorin e fundit të vitit 2027.

Vendimi vjen pas një vlerësimi të situatës dhe kërkesave logjistike për organizimin e një eventi ndërkombëtar të përmasave të tilla. Rajoni vazhdon të përballet me tensione dhe pasiguri të lidhura me konfliktet ushtarake.

Organizatorët thanë se festivali do të rikthehet në vitin 2027 me një program të ri, duke vazhduar të promovojë kinemanë dhe kineastët nga Arabia Saudite, rajoni dhe bota.

Ndërkohë, Fondacioni i Festivalit do të nisë programe gjatë gjithë vitit në Culture Square në Jeddah, me shfaqje filmash, aktivitete kulturore dhe programe për industrinë e filmit.