Agjërimi me intervale është bërë një nga mënyrat më të njohura për humbje peshe, por shkenca ende nuk ka një përgjigje përfundimtare nëse ai është më i dobishëm se dietat e tjera.

Metoda përfshin kufizimin e ushqimit në orare të caktuara të ditës ose agjërimin në ditë të caktuara të javës. Disa studime kanë sugjeruar përfitime për peshën, sheqerin në gjak, tensionin dhe disa tregues të shëndetit metabolik.

Megjithatë, rezultatet te njerëzit janë shumë më pak të qarta sesa ato të vërejtura te kafshët laboratorike. Për humbjen e peshës, agjërimi me intervale mund të sjellë mesatarisht rreth 5% humbje të peshës, por nuk duket të jetë domosdoshmërisht më efektiv se strategjitë e tjera ushqimore.

Një nga problemet kryesore në studimet për ushqyerjen është se njerëzit shpesh nuk e raportojnë saktë se çfarë dhe sa kanë ngrënë. Kjo e bën të vështirë matjen e efektit real të dietave.

Tash, studiuesit po përdorin teknologji të reja, si pajisje që monitorojnë përtypjen, pirunë inteligjentë, sensorë dhe analiza të gjakut e urinës, për të mbledhur të dhëna më të sakta.

Këto teknologji mund të ndihmojnë shkencëtarët të kuptojnë më mirë nëse agjërimi me intervale ka përfitime të veçanta apo thjesht funksionon sepse ndihmon njerëzit të konsumojnë më pak ushqim.

Ekspertët theksojnë se agjërimi me intervale nuk është “magjik” dhe se rezultatet ndryshojnë nga personi në person.