Me rastin e Ditës Ndërkombëtare të Rinisë, Ministria e Sportit dhe Rinisë, në bashkëpunim me Kartën Rinore Evropiane në Kosovë, do të organizojë aktivitetin “Zëri yt, e ardhmja jonë”.

Aktiviteti do t’u kushtohet të rinjve në Kosovë, me fokus në aspiratat, sfidat dhe mundësitë e tyre, si dhe në rëndësinë e përfshirjes së zërit të rinisë në proceset që ndikojnë në të ardhmen e vendit.

Ngjarja do të mbahet në orën 10:00, në Sheshin “Nënë Tereza” në Prishtinë, në hapësirën para Ministrisë së Sportit dhe Rinisë.

Organizatorët synojnë të promovojnë pjesëmarrjen aktive të të rinjve dhe të krijojnë hapësirë për diskutim mbi nevojat dhe perspektivat e gjeneratës së re.