Mbjellja e lulediellit po rikthehet në arat e Kosovës, si një kulturë me rëndësi për bujqësinë vendore dhe uljen e importit të vajit ushqimor.

Familja Sejdiu nga Podujeva këtë vit ka mbjellë rreth 120 deri në 130 hektarë me luledielli, me synimin për të siguruar rendiment dhe cilësi më të lartë të prodhimit. Sipërfaqe me këtë kulturë janë mbjellë edhe në Prizren.

Ekspertët vlerësojnë se luledielli, përveç sigurimit të lëndës së parë për prodhimin e vajit, ndihmon edhe në qarkullimin e kulturave bujqësore dhe në ruajtjen e cilësisë së tokës.

Profesorët e bujqësisë theksojnë se Kosova ka traditë në kultivimin e lulediellit, kolzës dhe kulturave të tjera industriale, ndërsa zhvillimi i tyre mund të krijojë vende pune dhe të kontribuojë në zvogëlimin e importeve.