Gjermani ka regjistruar rreth 5,120 vdekje të lidhura me të nxehtin e madh gjatë këtij viti, ku pjesa më e madhe e tyre kanë ndodhur në fund të muajit qershor, njoftoi Instituti gjerman për Shëndet Publik "Robert Koch" (RKI). Sipas raportit, shumica dërrmuese e viktimave (rreth 4,270) ishin të moshës 75 vjeç e lart, ku numri i grave ishte më i lartë, kryesisht për shkak se ato përbëjnë përqindjen më të madhe të popullatës në moshë të shtyrë.

Ky alarm në Gjermani pasqyron një situatë të rëndë në të gjithë Evropën Perëndimore, e cila sipas Shërbimit të BE-së për Ndryshimet Klimatike, "Copernicus", kaloi qershorin më të nxehtë në histori me një mesatare prej 20.74 gradë Celsius. Vetëm gjatë valës së të nxehtit nga 20 deri më 28 qershor, autoritetet në Francë, Belgjikë, Spanjë dhe Holandë raportuan mbi 4,700 vdekje të jashtëzakonshme (mbi mesataren e zakonshme).

Kjo situatë ka rritur presionin politik mbi kancelarin gjerman Friedrich Merz. Partia e Gjelbër e ka akuzuar qeverinë për heshtje ndaj kësaj krize dhe për shkurtimin e fondeve të dedikuara për mbrojtjen e klimës në projektbuxhetin e vitit 2027, duke rrezikuar kështu arritjen e objektivave për reduktimin e emetimeve të gazrave serrë deri në vitin 2030.