Në vitin 2025 në Kosovë janë regjistruar gjithsej 12.119 vdekje brenda dhe jashtë vendit, duke shënuar rritje krahasuar me vitin paraprak, bëjnë të ditur të dhënat e Agjencisë së Statistikave të Kosovës.

Prej tyre, 10.351 vdekje kanë ndodhur brenda territorit të Kosovës, ku 53,2% ishin meshkuj dhe 46,8% femra. Krahasuar me vitin 2024, ky numër është rritur për 214 raste.

Jashtë Kosovës janë regjistruar 1.768 vdekje të shtetasve kosovarë, që po ashtu paraqet rritje në raport me vitin e kaluar.

Sipas të dhënave komunale, numri më i madh i vdekjeve është regjistruar në Prishtinë, Prizren dhe Pejë.

Gjatë vitit 2025 janë regjistruar edhe 198 vdekje foshnjash, shumica e të cilave kanë ndodhur në ditët e para të jetës. Mosha mesatare e vdekjes në Kosovë ka qenë 72 vjeç, ku gratë jetojnë mesatarisht më gjatë se burrat.