Portieri italian Gianluigi Donnarumma u shpall fitues i çmimit prestigjioz “The Best” për portierin më të mirë të vitit 2025 nga FIFA.

26-vjeçari aktualisht luan te Manchester City, ku ka zhvilluar 25 ndeshje këtë sezon, dhe vazhdon të jetë portieri kryesor i Kombëtares së Italisë, që synon kualifikimin për Kupën e Botës.

Sezoni i kaluar ishte jashtëzakonisht i suksesshëm për Donnarumman, i cili luante te Paris Saint-Germain, duke fituar Ligën e Kampionëve dhe kampionatin francez, për të përmbyllur kështu aventurën katërvjeçare në Paris. Ai mposhti në garë emra të njohur si Alisson Becker, Thibaut Courtois, Emiliano Martinez, Manuel Neuer, David Raya, Yann Sommer dhe Wojciech Szczesny.

Donnarumma ishte transferuar te PSG në verën e vitit 2021 nga Milani si lojtar i lirë, por marrëdhënia e tij me trajnerin Luis Enrique u përkeqësua gjatë verës së kaluar, duke sjellë largimin e tij. Manchester City e transferoi për 30 milionë euro dhe nën drejtimin e Pep Guardiolës, Donnarumma u afirmua menjëherë si portieri i parë i skuadrës.

Në edicionin e këtij viti, çmimin për portieren më të mirë e fitoi anglezja Hannah Hampton, për sukseset e saj me Anglinë dhe Chelsea.