Një ngjarje e rrallë astronomike ka tërhequr vëmendjen e NASA-s dhe komunitetit shkencor ndërkombëtar. Agjencia hapësinore amerikane ka zbuluar një kometë ndëryjorë, e quajtur 3I/Atlas, e cila është vetëm objekti i tretë i konfirmuar ndonjëherë që vjen nga një sistem tjetër yjor dhe viziton sistemin tonë diellor.

Kometa u identifikua më 1 korrik nga teleskopi Atlas në Kili dhe ndodhet aktualisht rreth 670 milionë kilometra larg Diellit, pranë orbitës së Jupiterit. Ajo po udhëton me një shpejtësi të jashtëzakonshme prej 59 km/s, ndërsa pritet të kalojë më afër Diellit në fund të tetorit, duke lëvizur midis orbitave të Marsit dhe Tokës, por gjithmonë në një distancë të sigurt prej 240 milionë kilometrash nga Toka.

Ekspertët e NASA-s thonë se 3I/Atlas ka udhëtuar në hapësirë për qindra miliona apo edhe miliarda vjet, duke sjellë me vete informacion të çmuar për origjinën dhe përbërjen e objekteve ndëryjore. Sipas Paul Chodas nga Qendra për Studime të Objekteve pranë Tokës në NASA, kometa pritet të jetë më e madhe dhe më e ndritshme se dy “vizitorët” e mëparshëm – ʻOumuamua (2017) dhe 2I/Borisov (2019).

Deri në muajin shtator, kometa pritet të jetë e dukshme me teleskopë, ndërsa më pas do të fshihet përkohësisht pas Diellit dhe do të rishfaqet në dhjetor. Për astronomët dhe adhuruesit e qiellit, kjo përfaqëson një rast të rrallë për të vëzhguar nga afër një trup qiellor që nuk ka origjinë në sistemin tonë.

“Vizitorët nga një sistem tjetër yjor janë fenomen shumë i rrallë dhe emocionues për shkencën. Kjo kometë nuk është artificiale, por një dëshmi e udhëtimeve të gjata që objektet ndëryjore bëjnë nëpër galaktikë,” u shpreh Chodas.//AP