Tajlanda rikufizon përdorimin e kanabisit vetëm për qëllime mjekësore

Të Tjera | 30.06.2025 Ora 8:25

Tre vite pasi u bë vendi i parë në Azi që e dekriminalizoi kanabisin, Tajlanda ka miratuar rregulla të reja që kufizojnë përdorimin e tij vetëm për qëllime mjekësore. Që nga kjo javë, klientët duhet të kenë një recetë mjekësore për të blerë kanabis, ndërsa reklamimi dhe shitja për qëllime argëtimi ndalohen rreptësisht.

Ministri i Shëndetësisë, Somsak Thepsutin, paralajmëroi se Tajlanda synon në të ardhmen ta riklasifikojë kanabisin si narkotik, duke përmbysur liberalizimin e viteve të fundit që kishte sjellë bum dyqanesh, kafenesh dhe festivalesh në vend.

Rregullat e reja parashohin gjithashtu kontroll më të madh mbi kultivuesit, ndalimin e shitjes online dhe në automatet shitëse, si dhe dënime të ashpra për shkelësit. Përkrahësit e kanabisit kritikojnë se ndryshimet mund të dëmtojnë fermerët dhe bizneset e vogla, ndërsa autoritetet thonë se janë të domosdoshme për mbrojtjen e shëndetit publik dhe luftimin e trafikimit.