Qeset plastike të çajit lëshuan mes 555 dhe 2.498 grimca mikroplastike për filxhan, si dhe bisfenol A (BPA), tregon një studim i publikuar në revistën npj Science of Food.

Mikroplastika është bërë e pashmangshme. Gjendet nga tokat bujqësore te ujërat e ëmbla, dhe prej andej arrin në ushqime e pije. Disa marka çaji përdorin qese me rrjetë plastike, e cila degradohet kur bie në ujë të nxehtë.

Si u zhvillua studimi

Studiuesit analizuan katër marka çaji me qese plastike, të blera në Turqi, dhe i krahasuan me 14 marka çaji në masë. Qeset u lanë në ujë për tri minuta në rreth 95°C. Çaji në masë nuk u përgatit si pije, por iu nnënshtrua shpërbërjes kimike direkte. Grimcat u numëruan me mikroskop, një pjesë u identifikua me spektroskopi infra të kuqe, ndërsa kimikatet u matën me kromatografi.

Çfarë u gjet te qeset plastike

• Markat e testuara lëshuan mesatarisht 555 deri në 2.498 grimca për filxhan.

• Të gjitha grimcat ishin fije poliamidi, e njëjta lëndë me qesen.

• Metoda zbulonte vetëm grimca mbi 100 mikrometra, prandaj grimcat më të vogla nuk përfshihen në këto shifra.

• BPA dhe plastifikues (ftalate) u gjetën në të katër infuzionet.

Çfarë u gjet te çaji në masë

Gjethet e çajit në masë përmbanin 146 deri në 1.178 grimca për kilogram, pra rreth 0,3 deri në 2,4 grimca për një porcion prej 2 gramësh. Krahasimi nuk është i drejtpërdrejtë, sepse ky çaj nuk u përgatit si pije, por diferenca është e qartë. Këtu grimcat ishin përzierje polimeresh. Sipas autorëve, ato vijnë nga thasët plastikë në bujqësi, nga pluhuri atmosferik dhe nga pajisjet e përpunimit.

A është i rrezikshëm?

Sipas vlerësimit të rrezikut, sasia e mikroplastikës dhe e plastifikuesve që merret nga konsumi mesatar ditor i çajit është e papërfillshme. Shqetësimi kryesor është BPA. Sasia e modeluar arrinte 4,55% deri në 21,70% të vlerës ditore të pranueshme të Autoritetit Evropian për Sigurinë e Ushqimit (EFSA).

Autorët theksojnë se kjo është vetëm një pjesë e marrjes totale. Kufiri mund të tejkalohet nëse pihet më shumë çaj ose nëse BPA vjen edhe nga burime të tjera. Sipas tyre, ky rezultat është një paralajmërim, sidomos për gratë shtatzëna dhe fëmijët.

Si ta pakësoni ekspozimin

Studiuesit rekomandojnë çajin në masë, të përgatitur me infuzer qeramik ose metalik. Ata sugjerojnë gjithashtu larjen e gjetheve me ujë të ftohtë para përgatitjes, për të pakësuar ndotjen nga mjedisi.

Çfarë mbetet pa u përcaktuar

Studimi nuk i matën drejtpërdrejt efektet në shëndet dhe ka kufizime. Autorët thonë se nevojiten kampione më të gjera, karakterizim më i mirë i grimcave dhe matje direkte të kimikateve në çajin në masë të përgatitur si pije.

Burimi: Medical Xpress