Disa vende evropiane janë përballur me protesta sociale dhe politike, ku qytetarët kanë kundërshtuar rritjen e kostos së jetesës, përkeqësimin e shërbimeve publike dhe politikat qeveritare.

Në Francë, sipas raportimeve, rreth 700 mijë persona morën pjesë në demonstrata, ndërsa autoritetet raportuan mbi 1.800 arrestime. Në disa qytete pati përplasje me policinë, zjarrvënie dhe dëme materiale, megjithëse shumica e protestave u zhvilluan në mënyrë paqësore.

Tensione u regjistruan edhe në Itali, veçanërisht në Milano dhe Bolonja, ku protestues të maskuar sulmuan biznese dhe dëmtuan hapësira publike. Kryeministrja italiane, Giorgia Meloni, dënoi aktet e dhunës.

Ndërkohë, në Gjermani mbi 45 mijë nxënës dhe të rinj protestuan në rreth 100 qytete kundër planeve për zgjerimin e shërbimit ushtarak dhe mundësisë së rikthimit të rekrutimit të detyrueshëm.

Në Spanjë, protestat në Madrid u përqendruan te kriza e strehimit, rritja e qirave dhe dëbimet, me demonstruesit që kërkuan masa për ta bërë banimin më të përballueshëm.

Krahas tensioneve sociale, shqetësim për sigurinë evropiane mbetet edhe lufta hibride, e cila përfshin sulme kibernetike, dezinformim dhe propagandë që mund të nxisin mosbesim ndaj institucioneve dhe përçarje në shoqëri.