Në fund të dhjetorit 2019, një ekip virologësh nga tri qytete të mëdha kineze nisi analizimin e shtupave të marra nga pacientë të shtruar me pneumoni të rëndë dhe të pazakontë. Të gjithë kishin qenë në tregun e peshkut Huanan në Wuhan, para se të sëmureshin shpejt. Por analizat nuk dhanë rezultat: materiali gjenetik nuk përputhej me asnjë patogjen të zbuluar më parë.

Mjekët iu drejtuan një metode të re skriningu, të njohur si testimi metagjenomik. Në vend që të kërkojë mikrobe të njohura, ky test zbulon të gjitha mikroorganizmat e pranishëm në mostër, qofshin të identifikuar më parë apo jo. Kështu u pa se patogjeni ngjante shumë me familjen e koronavirusëve, ku bën pjesë edhe virusi që shkakton Sindromën Respiratore të Lindjes së Mesme (Mers). Shkencëtarët sapo kishin zbuluar Covid-19.

“Ishte një ndryshim rrënjësor krahasuar me pandemitë e mëparshme”, thotë Niranjan Nagarajan, profesor i asociuar në Universitetin Kombëtar të Singaporit. Njohja e patogjenit bëri të mundur zhvillimin e shpejtë të diagnostikimit dhe nxiti kërkimin e trajtimeve e të vaksinave në mbarë botën.

Ky mbetet përdorimi më i njohur i metagjenomikës deri tani, por testi po përdoret gjithnjë e më shumë në spitale. Nga diagnostikimi i shpejtë i sepsës deri te gjetja e shkaqeve të sëmundjeve të pashpjegueshme, ai po shpëton jetë.

Burimi: BBC