Ndërsa numri i përgjithshëm i goditjeve në tru ka rënë në Shtetet e Bashkuara gjatë 27 viteve të fundit, një studim i ri tregon se rastet po rriten te të rriturit e moshës 20 deri në 54 vjeç.

Studiuesit analizuan rastet e goditjeve në tru që kërkonin hospitalizim në rajonin e Cincinnati-t të Madh dhe Kentucky-t Verior, në periudhën nga viti 1993 deri në vitin 2020. Te grupmosha 20–54 vjeç, incidenca u rrit nga 33.9 në 62.2 raste për 100 mijë persona.

Forma më e zakonshme ishte goditja ishemike, me një rritje nga 23.8 në 47.3 raste për 100 mijë persona.

Ekspertët thonë se nuk ka një shkak të vetëm. Ndër faktorët e lidhur me rritjen përmenden presioni i lartë i gjakut, diabeti, obeziteti dhe mënyra sedentare e jetesës. Studiuesit theksojnë se nevojiten kërkime të mëtejshme për të kuptuar peshën e secilit faktor.

Mjekët rekomandojnë kontrollin e rregullt të tensionit dhe sheqerit në gjak, aktivitetin fizik, ushqyerjen e shëndetshme, gjumin e mirë dhe shmangien e duhanit.

Ndër shenjat paralajmëruese të goditjes në tru janë varja e papritur e fytyrës, dobësia e krahut dhe vështirësia në të folur. Në këto raste, kërkohet menjëherë ndihmë mjekësore.