Gati 300 sende personale të ikonës franceze të kinemasë, Brigitte Bardot, janë shitur në një ankand në Paris për më shumë se 953 mijë euro.

Në mesin e sendeve të ankanduara ishin një kopje e librit Kama Sutra, këpucët e saj të famshme balet, unaza me diamante, portrete dhe makina e shkrimit me të cilën Bardot shkroi autobiografinë e saj.

Të ardhurat nga ankandi do t’i dhurohen Fondacionit Brigitte Bardot, organizatës për mbrojtjen e të drejtave të kafshëve, kauzës së cilës aktorja iu përkushtua gjatë pjesës së dytë të jetës së saj.

Bardot u bë e famshme në vitet ’50 dhe ’60 dhe u shndërrua në një prej figurave më të njohura të kinemasë franceze. Ajo u largua nga aktrimi dhe iu përkushtua aktivizmit për kafshët. Bardot vdiq në dhjetor të vitit 2025, në moshën 91-vjeçare.

Megjithatë, ankandi nuk kaloi pa polemika. Bashkëshorti i saj, Bernard d’Ormale, e kritikoi shitjen duke i cilësuar sendet si shumë personale.