Historia pas krijimit të filmit legjendar “Rocky” po vjen në ekran me një film të ri biografik, të titulluar “I Play Rocky”.

Filmi tregon historinë e të riut Sylvester Stallone dhe përpjekjet e tij për të realizuar “Rocky”, filmin që në vitin 1976 u shndërrua në një prej dramave sportive më të famshme në historinë e kinemasë.

Në rolin e Stallones është Anthony Ippolito, ndërsa filmi është vlerësuar pozitivisht nga kritikët. “I Play Rocky” aktualisht ka 74% në Rotten Tomatoes, bazuar në 19 vlerësime.

Kritikët kanë vlerësuar veçanërisht interpretimin e Ippolitos, i cili është përpjekur të rikrijojë zërin, pamjen dhe karakteristikat e Stallones. Filmi gjithashtu sjell nostalgji për fansat e “Rocky”-t, përfshirë muzikën ikonë të Bill Contit dhe rikrijimin e disa prej skenave më të njohura.

Regjisori Peter Farrelly ka thënë se vetë Sylvester Stallone e ka parë filmin dhe i ka pëlqyer.

“I Play Rocky” do të publikohet më 20 nëntor 2026, pikërisht 50 vjet pas premierës së filmit origjinal “Rocky”.