Ministria e Infrastrukturës dhe Transportit ka njoftuar se gjatë ditës së sotme nuk do të ketë kufizime të qarkullimit për automjetet e transportit të mallrave me masë totale mbi 20 tonë.

Sipas ministrisë, bazuar në parashikimet zyrtare të temperaturave, nuk pritet të plotësohen kushtet për vendosjen e kufizimeve të përkohshme të qarkullimit.

Ministria do të vazhdojë të monitorojë parashikimet meteorologjike dhe, në rast të ndryshimit të kushteve, do t’i njoftojë me kohë qytetarët dhe operatorët ekonomikë.

Kufizimet për automjetet mbi 20 tonë vendosen në varësi të kushteve të përcaktuara me vendimin për qarkullimin e mjeteve të rënda.