Qeveria australiane pritet të prezantojë një projektligj që do t’u japë përdoruesve mundësinë të çaktivizojnë algoritmet që përcaktojnë përmbajtjen që shfaqet në rrjetet sociale.

Ministrja e Komunikimeve, Anika Wells, tha se ligji i ri për "përgjegjësinë digjitale" synon të vendosë masa bazë të sigurisë për platformat e mëdha teknologjike, si Meta, Google dhe TikTok.

Sipas propozimit, kompanitë që nuk u ofrojnë përdoruesve mundësinë për të zgjedhur nëse duan ose jo rekomandime të bazuara në algoritme, mund të përballen me gjoba të konsiderueshme.

Qeveria australiane thotë se qëllimi nuk është censurimi i rrjeteve sociale, por t’u japë qytetarëve më shumë kontroll mbi atë që shohin në platformat online dhe të zvogëlojë rrezikun nga përmbajtjet e dëmshme.

Megjithatë, disa përfaqësues të opozitës kanë shprehur shqetësime, duke thënë se masa mund të ndikojë në lirinë e shprehjes dhe të shërbejë si formë kontrolli ndaj përmbajtjes online.

Projektligji pritet të përfshijë edhe masa për ndalimin e shpërndarjes së përmbajtjeve të dëmshme, përfshirë materiale të paligjshme dhe përmbajtje që nxisin sjellje të rrezikshme te të rinjtë.