Nvidia ka njoftuar blerjen e kompanisë së inteligjencës artificiale Hugging Face për 12.9 miliardë dollarë, në një nga marrëveshjet më të mëdha të kompanisë për zgjerimin e ndikimit në industrinë e AI-së.

Hugging Face është një platformë që ofron qasje në modele dhe të dhëna të inteligjencës artificiale me burim të hapur. Platforma përdoret nga më shumë se 18 milionë zhvillues dhe studiues, me mbi 3 milionë modele dhe rreth 200 mijë klientë biznesorë.

Sipas marrëveshjes, Nvidia do t’u paguajë aksionarëve të Hugging Face 11.9 miliardë dollarë, ndërsa 1 miliard dollarë të tjerë do të përdoren për të mbajtur punonjësit e kompanisë që do t’i bashkohen Nvidia-s. Marrëveshja pritet të përfundojë në gjysmën e parë të vitit të ardhshëm.

Drejtori ekzekutiv i Nvidia-s, Jensen Huang, ka thënë se platforma do të vazhdojë të jetë e hapur, ndërsa synimi është që AI-ja të bëhet më e qasshme për zhvilluesit dhe kompanitë në mbarë botën.

Marrëveshja vjen në një kohë kur po zhvillohet një debat i madh në industrinë e teknologjisë për modelet e hapura dhe të mbyllura të AI-së, ndërsa Nvidia po investon gjithnjë e më shumë për të forcuar pozitën e saj në ekosistemin e inteligjencës artificiale.

Hugging Face ishte vlerësuar me 4.5 miliardë dollarë në vitin 2023, ndërsa tash marrëveshja e re e rrit ndjeshëm vlerën e kompanisë.