Sistemet e mbikëqyrjes me kamera dhe inteligjencë artificiale po zgjerohen në qytete të ndryshme të botës, duke ngritur debat mbi balancën mes sigurisë dhe privatësisë.

Në Nju Jork, sistemi i policisë Domain Awareness System lidh më shumë se 80 mijë kamera me dronë, të dhëna nga rrjetet sociale dhe teknologji për gjurmimin e automjeteve. Sipas ekspertëve, këto sisteme mund të përdoren për të krijuar një pasqyrë të lëvizjeve të një personi.

Një tjetër kompani, Flock Safety, ka një rrjet prej më shumë se 100 mijë kamerash në rreth 6 mijë komunitete në SHBA. Sistemet e saj përdoren kryesisht për identifikimin dhe gjurmimin e automjeteve, ndërsa kompania thotë se teknologjia ndihmon në zgjidhjen e rasteve kriminale.

Megjithatë, përdorimi i këtyre teknologjive ka shkaktuar kundërshtime. Kritikët paralajmërojnë se mbikëqyrja masive mund të cenojë privatësinë dhe se gabimet e sistemeve mund të çojnë në ndalimin apo hetimin e personave të pafajshëm.

Për të kuptuar se sa e përhapur është mbikëqyrja në zona të ndryshme, ekzistojnë edhe harta publike si Atlas of Surveillance dhe DeFlock, të cilat tregojnë vendndodhjen e disa kamerave dhe teknologjive të mbikëqyrjes.

Debati vazhdon: a na bëjnë këto teknologji më të sigurt, apo thjesht po bëjnë që të jetojmë në një shoqëri ku çdo lëvizje mund të regjistrohet?