Japonia po shtrëngon rregullat për të huajt, në një kohë kur vendi po përballet me krizë demografike dhe mungesë të fuqisë punëtore.

Nga tetori, tarifa për aplikim për rezidencë të përhershme do të rritet në 200 mijë jen, rreth 1,257 dollarë, që është rreth 20 herë më shumë se më parë. Edhe tarifat për viza pune dhe studentore pritet të rriten.

Kushtet për marrjen e rezidencës së përhershme do të bëhen gjithashtu më të rrepta. Aplikantët do të duhet të kenë të ardhura mbi mesataren e familjeve japoneze, ndërsa nga prilli i ardhshëm do të kërkohet edhe një fond i parashikuar pensioni dhe njohuri të gjuhës japoneze në nivel të ndërmjetëm.

Japonia ka një numër rekord të banorëve të huaj. Vitin e kaluar, numri i tyre arriti në rreth 4.1 milionë, ose 3.4 për qind e popullsisë.

Qeveria thotë se masat synojnë krijimin e një shoqërie ku japonezët dhe të huajt bashkëjetojnë në mënyrë të rregullt. Megjithatë, ndryshimet kanë shkaktuar shqetësim te shumë të huaj që jetojnë, punojnë apo studiojnë në Japoni.

Masat vijnë në një periudhë kur vendi po përpiqet të përballet me rënien e lindshmërisë dhe mungesën e punëtorëve, ndërsa njëkohësisht po përballet me kritika për turizmin masiv dhe rritjen e kostos së jetesës.