Netflix po planifikon të zgjerojë universin e filmit aksion “Counterattack”, një prej produksioneve joanglisht më të suksesshme në platformë.

Filmi meksikan, i publikuar në vitin 2025, ka regjistruar më shumë se 69 milionë shikime në Netflix. Suksesi i tij ka bërë që platforma të zgjerojë bashkëpunimin me ekipin krijues të filmit dhe të investojë më shumë në kinemanë meksikane.

Sipas raportimeve, Netflix ka konfirmuar një “zgjerim të universit” të “Counterattack”. Megjithatë, projektet e reja nuk pritet të jenë një vazhdim apo paraprijës i drejtpërdrejtë i filmit origjinal.

“Counterattack” ndjek kapitenin Armando Guerrero dhe njësinë elitare të forcave speciale meksikane, të cilët, pasi shpëtojnë dy pengje, zbulojnë një varrezë masive të lidhur me një kartel të fuqishëm. Zbulimi i tyre i vendos ushtarët në shënjestër dhe nis një luftë për mbijetesë.

Filmi është regjisuar nga Chava Cartas dhe në rolet kryesore luajnë Luis Alberti, Noé Hernández dhe Luis Curiel.

“Counterattack” mund ta shikoni aktualisht në Netflix.