Instituti Kombëtar i Shëndetësisë Publike të Kosovës (IKShPK) ka njoftuar se nga 16 prilli deri më 3 gusht 2026 janë konfirmuar gjithsej 99 raste me fruth në Kosovë.

Vetëm gjatë javës së fundit janë regjistruar 21 raste të reja. Numri më i madh i rasteve është raportuar në Prishtinë (33), Fushë-Kosovë (25), Ferizaj (12) dhe Kaçanik (7).

IKShPK bën të ditur se numri i rasteve këtë vit është më i lartë krahasuar me të njëjtën periudhë të vitit të kaluar, kur ishin konfirmuar 65 raste.

Instituti u bën thirrje qytetarëve që, në rast të simptomave si temperaturë e lartë, skuqje në lëkurë, kollë, rrufë ose konjuktivit, të kërkojnë menjëherë ndihmë mjekësore.

Po ashtu, IKShPK u rekomandon prindërve dhe kujdestarëve të kontrollojnë statusin e vaksinimit të fëmijëve, duke theksuar se vaksinimi mbetet mënyra më efektive për parandalimin e fruthit dhe mbrojtjen e shëndetit publik.