Agjencia e Menaxhimit Emergjent (AME) ka paralajmëruar se temperaturat e larta gjatë ditëve në vijim rrisin ndjeshëm rrezikun për shpërthimin dhe përhapjen e zjarreve në fusha dhe pyje.

Agjencia u bën thirrje qytetarëve, veçanërisht fermerëve dhe bujqve, të respektojnë masat parandaluese. Ndalohet rreptësisht djegia e kashtës, mbetjeve pas korrjeve dhe vegjetacionit në ara, pasi kjo mund të shkaktojë zjarre të pakontrolluara.

AME rekomandon që kombajnat dhe traktorët të kontrollohen para përdorimit, të jenë të pajisur me bombola funksionale për fikjen e zjarrit dhe të ketë rezerva uji në zonat ku zhvillohen punimet bujqësore.

Po ashtu, duke u bazuar në rekomandimet e IKSHPK-së, qytetarët këshillohen të shmangin punët e rënda fizike në ambiente të hapura nga ora 11:00 deri në 17:00. Agjencia apelon që të mos ndizet zjarr gjatë piknikëve apo qëndrimeve në natyrë, pasi edhe një shkëndijë e vetme mund të shkaktojë pasoja të mëdha.