Një studim i ri ka zbuluar se prekjet, përqafimet dhe puthjet mes majmunëve të afërt me njerëzit mund të jenë një mënyrë e lashtë për të krijuar besim dhe për të ulur tensionin.

Studiues nga Universiteti i Durhamit vëzhguan shimpanzetë dhe bonobot dhe zbuluan se, para situatave stresuese, sidomos para konflikteve për ushqim, këto kafshë kërkonin kontakt fizik për t’u qetësuar dhe për të bashkëpunuar.

Sipas studiuesve, grupet ku kishte më shumë përqafime dhe prekje shfaqnin më shumë tolerancë dhe bashkëpunim.

Ekspertët thonë se kjo sjellje mund të jetë miliona vite e vjetër dhe se edhe njerëzit sot përdorin forma të ngjashme komunikimi, si përqafimet para një ngjarjeje të rëndësishme apo grumbullimet e ekipeve para ndeshjeve sportive.