Shporta e konsumit në Kosovë është shtrenjtuar, ndërsa inflacioni ka arritur në 6 për qind, sipas të dhënave të fundit të Agjencisë së Statistikave të Kosovës (ASK).

Rritjet më të mëdha të çmimeve janë regjistruar te transporti (13.7%) dhe energjia elektrike, gazi dhe lëndët djegëse (11.1%), krahasuar me qershorin e vitit të kaluar.

Eksperti i ekonomisë, Fidan Qerimi, vlerëson se konfliktet në Lindjen e Mesme mund të ndikojnë në rritje të mëtejshme të inflacionit, ndërsa thekson se pagat, pensionet dhe skemat sociale nuk po rriten me të njëjtin ritëm si kostoja e jetesës.

Ndërkohë, Banka Qendrore e Kosovës ka parashikuar një inflacion mesatar prej 6.7 për qind gjatë këtij viti, duke theksuar se tensionet gjeopolitike mbeten ndër rreziqet kryesore për ekonominë.