Presidenti i Shteteve të Bashkuara, Donald Trump, ka deklaruar se gjashtë persona janë arrestuar për dëmtimin e fundit të Reflecting Pool pranë Memorialit të Lincolnit në Uashington, ndërsa shtatë të tjerë janë gjobitur. Megjithatë, ai nuk ka paraqitur prova publike që mbështesin pretendimet e tij.

Në një postim në rrjetet sociale, Trump tha se dëmtimi i veshjes së re të pellgut ishte shkaktuar qëllimisht dhe përbënte një akt kriminal. Ai premtoi se administrata do të publikojë fotografi dhe pamje që, sipas tij, provojnë aktin e vandalizmit.

Reflecting Pool i Memorialit të Lincolnit iu nënshtrua një projekti rehabilitimi me vlerë mbi 14 milionë dollarë, pjesë e përgatitjeve për festimet e 250-vjetorit të pavarësisë së SHBA-së. Projekti përfshinte zbrazjen e ujit dhe lyerjen e pjesës së poshtme me një ngjyrë blu të zgjedhur nga vetë Trump, të cilën ai e ka quajtur “American flag blue”.

Megjithatë, pas përfundimit të punimeve janë shfaqur probleme të shumta, përfshirë shtresa algash në ujë dhe pjesë të veshjes së re që janë shkëputur nga fundi i pellgut. Trump ka fajësuar vazhdimisht vandalizmin për këto dëmtime, edhe pse deri më tani nuk janë publikuar prova që e mbështesin këtë version.

Sipas raportimeve, autoritetet federale kanë shtuar masat e sigurisë rreth zonës, ndërsa janë vendosur edhe gardhe mbrojtëse përpara festimeve të 4 Korrikut. Një zëdhënëse e Departamentit të Brendshëm deklaroi se vendosja e gardheve ishte planifikuar më herët, por u përshpejtua për shkak të shqetësimeve mbi dëmtimet e mundshme.

Ndërkohë, kompania që realizoi punimet ka pranuar se disa pjesë të pellgut kanë nevojë për riparime, por ka theksuar se bëhet fjalë për zona të kufizuara dhe jo për një dështim të përgjithshëm të projektit.

Debati është thelluar edhe pas raportimeve për ngordhjen e disa rosave në pellgun e mbuluar nga algat. Një organizatë mjedisore ka kërkuar hetim zyrtar mbi rastin, duke ngritur shqetësime për ndikimin e gjendjes së ujit në jetën e egër.

Sipas ekspertëve, sipërfaqja e errët e pellgut mund të rrisë temperaturën e ujit dhe të favorizojë zhvillimin e algave, ndërsa autoritetet janë parë duke përdorur peroksid hidrogjeni në përpjekje për pastrimin e tij. //AP