Mbi 40 persona kanë humbur jetën nga komplikimet e fruthit në Meksikë që nga fillimi i vitit 2025, ndërsa janë konfirmuar më shumë se 17 mijë raste të infektimit, sipas Ministrisë së Shëndetësisë së vendit.

Shpërthimi i sëmundjes besohet të ketë nisur pasi një djalë 9-vjeçar u kthye nga një vizitë familjare në Texas të SHBA-së dhe, pa e ditur familja, kishte qenë i ekspozuar ndaj virusit. Pas kthimit në Meksikë, ai u sëmur dhe brenda pak javësh virusi u përhap në komunitetin ku jetonte.

Autoritetet thonë se shumica e të infektuarve nuk ishin vaksinuar. Ekspertët paralajmërojnë se fruthi është një nga sëmundjet më ngjitëse në botë dhe mund të përhapet përmes kollitjes, teshtimës apo edhe bisedës.

Sipas Organizatës Botërore të Shëndetësisë, të paktën 95% e komunitetit duhet të jetë i vaksinuar me dy doza për të parandaluar përhapjen e virusit.

Ekspertët në Meksikë vlerësojnë se rënia e vaksinimit ndër vite dhe mungesa e mbulimit të plotë kanë ndikuar në përhapjen e shpejtë të epidemisë.