Muzikanti i njohur Bobby Hart, bashkëautor i disa prej hiteve më të mëdha të grupit The Monkees, ka ndërruar jetë në moshën 86-vjeçare në shtëpinë e tij në Los Anxhelos, pas një periudhe të vështirë shëndetësore që nisi vitin e kaluar

Micky Dolenz, anëtari i fundit i gjallë i The Monkees, i bëri një homazh prekës në Instagram, duke ndarë disa foto të vjetra dhe fjalë mirënjohjeje:

“Një tjetër i madh ka ikur. Bobby Hart, i cili bashkë me Tommy Boyce shkroi dhe prodhoi disa nga këngët më të mëdha të The Monkees, jo vetëm që dha një kontribut jetik për suksesin e grupit, por mbi të gjitha, për thelbin, shpirtin e gjithë projektit.

Talenti, karizma, humori i tij i mirë dhe qetësia përballë një udhëtimi shpesh kaotik sillnin gjithmonë paqe dhe frymëzim për të gjithë rreth tij. Ai ishte qetësia në syrin e uraganit. Pushofsh në paqe, Bobby.”

Në mesin e krijimeve të tij, Hart bashkë me partnerin e tij të zakonshëm në shkrime Tommy Boyce, sollën hite si “Last Train to Clarksville” dhe “(I’m Not Your) Steppin’ Stone”, si dhe këngën e famshme hyrëse të The Monkees, me refrenin tashmë legjendar “Hey, hey, we’re the Monkees.”