Me nisjen e sezonit të ri të NFL, përveç parashikimeve për skuadrat që do të luftojnë për trofeun Vince Lombardi, fokusi është zhvendosur tek performanca muzikore e Super Bowl-it.

Komisioneri i NFL, Roger Goodell, në një intervistë për NBC “Today”, tha se nuk e përjashton mundësinë që Taylor Swift të performojë në “halftime show” më 8 shkurt. “Ne gjithmonë do ta donim Taylor-in në skenë. Ajo është një talent i jashtëzakonshëm dhe do të ishte e mirëpritur në çdo kohë,” u shpreh ai, megjithëse nuk dha një përgjigje konkrete për negociatat.

Lidhja e Swift me lojtarin e Kansas City Chiefs, Travis Kelce, ka rritur edhe më shumë interesimin për të. Episodi i fundit i podkastit “New Heights”, ku Swift foli për albumin e saj të ri, theu rekorde botërore me mbi 22 milionë shikime në YouTube, duke treguar ndikimin e saj të jashtëzakonshëm.

Ndërkohë, vendimi përfundimtar për artistin që do të performojë pritet nga Roc Nation, kompania e Jay-Z që këshillon NFL për organizimin e “halftime show”. Deri atëherë, fansat do të duhet të presin, por një gjë është e sigurt: ideja e Taylor Swift në skenën e Super Bowl-it ka bërë tashmë bujë në mbarë botën.