Kompania amerikane A24 dhe gjiganti kinez CMC Pictures kanë bashkuar forcat për të sjellë në Amerikën e Veriut filmin e animuar Ne Zha 2 në versionin anglisht, me aktoren e njohur Michelle Yeoh në rolin kryesor të dubluar. Filmi do të shfaqet nga 22 gushti në SHBA, Kanada, Australi dhe Zelandë të Re, në formatet Imax, 3D dhe të tjera formate premium.

Ne Zha 2 është bërë filmi i animuar më fitimprurës i të gjitha kohërave, duke arkëtuar 2.2 miliardë dollarë që nga publikimi gjatë festës së Vitit të Ri Hënor në Kinë. Filmi është gjithashtu në vendin e pestë si më i shikuari në botë, duke tejkaluar edhe suksese të mëdha si Inside Out 2.

Filmi është një vazhdim i Ne Zha (2019), një rikonceptim modern i heroit mitologjik kinez dhe paraqet një përzierje të thellë emocionale dhe vizuale që ka marrë vlerësime të larta në platformat ndërkombëtare si Rotten Tomatoes dhe Letterboxd.

Bashkëpunimi mes A24 dhe CMC shihet si një test për tregun amerikan, për të parë nëse audienca perëndimore është e gatshme të përqafojë tregime kulturore aziatike në shkallë të gjerë kinematografike.