Në selinë e KFOR-it në Kampin Film City në Prishtinë është mbajtur një trajnim i përbashkët ndërkombëtar për evakuim mjekësor ajror, me pjesëmarrjen e njësive mjekësore të katër ushtrive: të Shteteve të Bashkuara të Amerikës, Hungarisë, Gjermanisë dhe Zvicrës.

Stërvitja përfshinte skenarë të evakuimit të të plagosurve në kushte të simuluara reale, si dhe procedurat e ngarkimit dhe shkarkimit të pacientëve gjatë operacioneve ajrore.

Sipas njoftimit të lëshuar nga misioni i NATO-s në Kosovë, qëllimi kryesor ishte standardizimi i procedurave ndërmjet shteteve pjesëmarrëse dhe përmirësimi i gatishmërisë për të reaguar në raste krizash mjekësore.

KFOR-i theksoi se ky aktivitet është pjesë e angazhimit të vazhdueshëm për të zbatuar mandatin e tij – të bazuar në Rezolutën 1244 të Këshillit të Sigurimit të OKB-së – me qëllim krijimin e një ambienti të sigurt dhe të qetë për të gjithë qytetarët dhe komunitetet në Kosovë, si dhe garantimin e lirisë së lëvizjes. Operacionet zhvillohen në koordinim të ngushtë me Policinë e Kosovës dhe EULEX-in, duke respektuar rolet e secilit si akterë të sigurisë.