A e ndjeni veten të mërzitur me partnerin tuaj? A ju zë ankthi kur shkoni në shtëpi pas pune? A jeni tepër të lodhur për një takim romantik, e aq më pak për intimitet? Kur mendoni për të ardhmen, a ju duket sikur çdo ditë do të jetë njësoj si dje?

Këto janë shenja të qarta të djegies emocionale në marrëdhënie, një gjendje që po prek gjithnjë e më shumë çifte. Si terapistë, shpesh shohim njerëz që ndihen të rraskapitur, të stresuar, cinikë dhe madje të pandjeshëm ndaj njëri-tjetrit.

Çiftet që përjetojnë këtë lodhje emocionale shpesh kanë konflikte të vazhdueshme, ndjejnë se po bëhen gjithnjë e më të papajtueshëm, nuk shohin ndryshim në horizont dhe nuk besojnë më në të ardhmen e përbashkët.

Çfarë është djegia emocionale në marrëdhënie?

Sipas psikologes Rachel Needle, djegia emocionale është një gjendje e rraskapitjes psikologjike që ndodh kur stresi dhe presioni i përditshëm në një lidhje tejkalon mundësitë për t'u përkujdesur për të.

Kjo lodhje nuk ndikon vetëm në emocionet. Ajo prek ndjeshëm edhe intimitetin dhe jetën seksuale të çiftit. Kur një ose të dy partnerët janë emocionalisht të shteruar, zakonisht ndodh largim emocional, humbje e dëshirës seksuale dhe mungesë afërsie.

Shkaqet e djegies në marrëdhënie

• Ndaje e pabarabartë e përgjegjësive në shtëpi

• Stresi nga puna ose mungesa e ekuilibrit punë-jetë

• Konflikte familjare me prindërit apo të afërmit

• Rutinë monotone dhe mungesë rritjeje si çift

• Mërzia në marrëdhënie – seksuale apo emocionale

Sipas ekspertëve, kjo gjendje rritet gradualisht dhe nuk është gjithmonë rezultat i një krize të vetme, por i shumë nevojave të parealizuara dhe konflikteve të pazgjidhura që grumbullohen me kohën.

Si ta përballoni djegien emocionale në marrëdhënie?

1. Pranoni realitetin, pa fajësuar

Shprehni ndjenjat tuaja me sinqeritet dhe pa gjykim. Përdorni fraza si "Unë ndjej" ose "Kam vënë re..." për të nisur një bisedë të ndershme me partnerin.

2. Merrni përgjegjësi personale

Mos prisni që vetëm partneri të ndryshojë. Pyesni veten: "Si po kontribuoj unë në këtë situatë?" Vetëreflektimi është çelësi për të ndryshuar dinamikën në çift.

3. Komunikoni rregullisht

Vendosni një kohë çdo javë për të diskutuar ndjenjat dhe nevojat tuaja. Mos e bëni një bisedë të vetme – bëjeni pjesë të zakonshme të marrëdhënies suaj.

4. Krijoni përvoja të reja së bashku

Provojeni një hobi të ri, një recetë, një udhëtim të shkurtër. Lojërat, aktivitetet argëtuese dhe kreativiteti mund të rikthejnë lidhjen emocionale dhe seksuale.

5. Kujdesuni për veten

Lodhja personale ushqen lodhjen në çift. Gjeni kohë për gjumë të mirë, aktivitet fizik, meditim apo aktivitete që ju mbushin me energji.

6. Kërkoni ndihmë profesionale

Një terapist çifti ose seksolog mund t’ju ndihmojë të riorganizoni marrëdhënien përpara se të shkoni drejt ndarjes. Ndihma e specializuar është shpesh hapi që ndihmon më shumë në rilidhjen emocionale.

Në fund...

Djegia emocionale në marrëdhënie nuk është fundi, por një sinjal që ka nevojë për kujdes dhe riorganizim. Me përkushtim, sinqeritet dhe mbështetje të ndërsjellë, shumë çifte arrijnë të kalojnë këtë fazë dhe të rikthejnë intimitetin e humbur. CNN