Në New York ka nisur zgjedhja e jurisë për gjykimin penal ndaj Sean "Diddy" Combs, një nga emrat më të fuqishëm të industrisë së muzikës në SHBA. Ai përballet me akuza të rënda që përfshijnë konspiracion kriminal (racketeering), trafikim seksual dhe transport për qëllime prostitucioni – akuza këto që, nëse vërtetohen, mund t’i sjellin dënim me burgim të përjetshëm.

Përveç çështjes penale federale, Diddy po përballet edhe me dhjetëra padi civile nga individë që e akuzojnë atë për abuzim seksual, përdorim droge ndaj viktimave, kërcënime dhe përpjekje për t’i heshtur ata. Ai i ka mohuar të gjitha akuzat dhe pretendimet, duke i quajtur “sulme për përfitim të shpejtë financiar”.

Sean Combs, i njohur më parë si Puff Daddy, P. Diddy apo Love, e nisi karrierën në vitet ’90 duke promovuar artistë si Mary J. Blige dhe Notorious B.I.G. Me labelin Bad Boy Records, ai ndikoi fuqishëm në industrinë e hip-hopit, duke bashkëpunuar edhe me emra si Faith Evans, Ma$e, Jennifer Lopez dhe Mariah Carey. Jashtë muzikës, ai ndërtoi një perandori biznesi që përfshinte bashkëpunime me marka të njohura si Cîroc.

Por tani, karriera e tij është në qendër të vëmendjes për arsyet më të errëta. Prokurorët pretendojnë se ai udhëhoqi një rrjet kriminal ku përfshiheshin përdorimi i drogës, armëve dhe abuzimeve seksuale ndaj grave. Gjatë bastisjeve në vilat e tij, u raportua se u gjetën droga dhe më shumë se 1,000 shishe vaj bebeje, të përdorura sipas policisë në festa të quajtura "freak offs".

Gjykimi i tij zhvillohet në Gjykatën Federale të Distriktit të Jugut të New York-ut, nën drejtimin e gjykatësit Arun Subramanian. Prokuroria do të paraqesë rastin e saj për tre javë, ndërsa mbrojtja ka kërkuar vetëm një javë. Diddy, i cili është aktualisht në paraburgim në burgun e Brooklynit, nuk ka arritur të lirohet me kusht, pasi gjyqtari e ka cilësuar si “rrezik për arratisje” dhe “kërcënim për dëshmitarët”.

Gjykimi pritet të zgjasë disa javë, dhe nëse shpallet fajtor, Diddy mund të përballet me burgim të përjetshëm për akuzat më të rënda.