Bordi i muzeut Louvre në Paris ka vendosur të rrisë çmimin e biletave për vizitorët nga vendet jashtë Bashkimit Evropian dhe Zonës Ekonomike Evropiane. Duke filluar nga 14 janari, turistët nga SHBA, Mbretëria e Bashkuar, Kina dhe vende të tjera do të paguajnë 32 euro për hyrjen në muze, një rritje prej 10 eurosh.

Sipas menaxhmentit, rritja e çmimit do të gjenerojë miliona euro shtesë për të financuar investimet në siguri dhe modernizimin e muzeut. Vendimi vjen pas kritikave të forta ndaj sistemit të sigurisë së Louvre-it, sidomos pas grabitjes së tetorit, ku një bandë katërpersonëshe vodhi bizhuteri me vlerë mbi 100 milionë dollarë.

Me rreth 9 milionë vizitorë në vit, shumica prej tyre turistë të huaj, Louvre përballet prej kohësh me mbipopullim, sidomos pranë veprës ikonike “Mona Lisa”. Presidenti Emmanuel Macron ka paralajmëruar reforma të rëndësishme për muzeun, përfshirë zhvendosjen e pikturës në një hapësirë të re dhe rritjen e tarifave për vizitorët jashtë BE-së në vitin 2026.

Muzeu ka shpallur gjithashtu plane për renovime të gjera dhe shtimin e shërbimeve si restorante dhe tualete, projekte që pritet të kushtojnë qindra miliona euro. Kohët e fundit, Louvre mbylli një galeri të qeramikës greke për shkak të problemeve strukturore, ndërsa një audit zyrtar theksoi se muzeu ka investuar më shumë në blerje veprash, por më pak në mirëmbajtje.