Filmi “Downton Abbey: The Grand Finale”, pjesa e tretë dhe e fundit e sagës së njohur historike, ka kaluar shifrën prej 30 milionë dollarësh në arkëtimet botërore, vetëm pesë ditë pas premierës së tij më 12 shtator.

Sipas të dhënave të “The Numbers”, filmi ka arkëtuar gjithsej 34.6 milionë dollarë, ku 22.3 milionë vijnë nga kinematë amerikane dhe 12.3 milionë nga tregjet ndërkombëtare. Vetëm gjatë fundjavës së hapjes, produksioni realizoi 18.1 milionë dollarë, duke u renditur si hapja e dytë më e madhe e trilogjisë, pas filmit të parë të vitit 2019.

“Downton Abbey: The Grand Finale” është pritur mirë edhe nga kritika dhe publiku, duke marrë 91% vlerësim pozitiv në Rotten Tomatoes dhe 96% nga shikuesit.
Megjithatë, me një buxhet të raportuar prej 50 milionë dollarësh, suksesi financiar i plotë mbetet ende një sfidë, pasi filmi duhet të arrijë mbi 125 milionë dollarë për të kthyer investimin.