Një turbinë nënujore, e zhytur rreth 40 metra nën sipërfaqe pranë brigjeve të Skocisë, ka qëndruar në punë të vazhdueshme për më shumë se 6 vjet, duke shënuar një arritje historike për energjinë e rinovueshme të prodhuar nga baticat.

Sipas Ocean Energy Europe, kjo qëndrueshmëri e jashtëzakonshme tregon se teknologjia është e gatshme për zhvillim komercial dhe më tërheqëse për investitorët. Nëse turbinat do të kërkonin mirëmbajtje çdo pak vite, projektet do të ishin shumë të kushtueshme për t’u realizuar.

Projekti MeyGen, afër ngushticës Pentland Firth, ka aktualisht katër turbina me kapacitet 1.5 megavat secila, që prodhojnë energji të mjaftueshme për të furnizuar deri në 7,000 shtëpi në vit. Kompania suedeze SKF njoftoi se një prej turbinave të saj ka arritur rekordin prej 6.5 vitesh pa nevojë për mirëmbajtje të papritur.

Ekspertët e energjisë detare vlerësojnë këtë si një “moment historik”, duke e krahasuar me ndërtimin e turbina ere të zhytura nën ujë – një sfidë teknike e jashtëzakonshme.

Mbretëria e Bashkuar, dhe veçanërisht Skocia, janë në pararojë të energjisë së baticës, ndërkohë që projekti MeyGen planifikon të zgjerohet me 20 turbina të reja deri në vitin 2030 dhe në fund të arrijë në 130 turbina, duke rritur fuqinë prodhuese dhe ndikimin pozitiv në tranzicionin global drejt energjisë së pastër.