Një vazhdim i filmit të njohur të vitit 1995, Crimson Tide, është në zhvillim dhe producentët kanë ambicie që Denzel Washington të rikthehet në rolin e tij ikonik. I drejtuar nga Tony Scott, ky thriller aksion u bë i famshëm për tensionin e lartë dhe skenarët plot energji, duke ndjekur përplasjen e egos mes një oficeri të sapoemëruar (Denzel Washington) dhe komandantit veteran (Gene Hackman) në një nëndetëse bërthamore amerikane, pas interpretimeve të ndryshme për një urdhër lëshimi raketash.

Filmi mori kritika përgjithësisht pozitive për ndërtimin e fortë të tensionit dhe dialogët e mprehtë — falë edhe disa ndërhyrjeve të paautorizuara të Quentin Tarantinos — dhe për faktin që Tony Scott e solli mjeshtërinë e tij të aksionit në nivelin më të lartë. Filmi pati sukses të madh edhe në arkë, duke arkëtuar mbi 157 milionë dollarë kundrejt një buxheti prej 53 milionësh.

Tani, gjatë një paraqitjeje në The Rich Eisen Show, producenti legjendar Jerry Bruckheimer zbuloi se një vazhdim i Crimson Tide është në përgatitje. Ai tha se tashmë kanë një regjisor dhe skenarist që po punojnë ngushtë me Marinën Ushtarake për të krijuar një histori të denjë. Bruckheimer beson se Denzel Washington do të pranojë të rikthehet nëse përballet me një skenar të fortë.

“Kemi një regjisor dhe skenarist shumë të mirë që janë duke folur me Marinën për situatat që ndodhin nën ujë. Nëse i ofrojmë një skenar të mirë, mendoj që Denzel do ta bëjë,” tha Bruckheimer.

Për momentin nuk ka datë zyrtare për fillimin e xhirimeve apo detaje të tjera rreth kastit, por entuziazmi për të rikthyer këtë histori klasike të tensionit bërthamor duket i madh.