Drejtori ekzekutiv i kompanisë ukrainase të çelikut Metinvest, Yuriy Ryzhenkov, i ka kërkuar Bashkimit Evropian të lehtësojë kufizimet për importin e çelikut nga Ukraina, duke i cilësuar masat aktuale si të padrejta në rrethanat e luftës me Rusinë.

BE-ja ka kufizuar importin e çelikut pa tarifa doganore në 18.3 milionë tonë në vit, rreth 47% më pak krahasuar me nivelet e vitit 2024. Masat synojnë të mbrojnë prodhuesit evropianë nga importet me çmime të ulëta, veçanërisht nga Kina dhe Turqia.

Ryzhenkov paralajmëroi se eksportet ukrainase të çelikut drejt BE-së mund të bien për 50 deri në 60 për qind. Sipas tij, tregu evropian është thelbësor për mbijetesën e industrisë ukrainase, e cila është dëmtuar rëndë nga sulmet ruse që prej vitit 2022.

Nga ana tjetër, Komisioni Evropian deklaroi se gjatë hartimit të politikës tregtare është marrë parasysh situata e vështirë e Ukrainës. Sipas tij, kuota e veçantë për këtë vend garanton vazhdimin e eksporteve, ndonëse në nivele më të ulëta se në vitet e mëparshme.