Universi i ri i DC-së po përgatitet për filmin “Clayface”, i cili do ta prezantojë një prej kundërshtarëve të njohur të Batmanit, ndërsa prania e Kalorësit të Errët do të ndihet edhe pa u shfaqur drejtpërdrejt në film.

Regjisori James Watkins ka treguar në një intervistë për revistën “SFX” se Gotham City do të paraqitet si një qytet i zymtë, i korruptuar dhe plotësisht i lënë pas dore. Për krijimin e atmosferës, ekipi është frymëzuar nga fotografitë e rrugëve të Nju-Jorkut gjatë viteve ’80 dhe ’90.

Filmi do të përqendrohet te Matt Hagen, personazhi që shndërrohet në Clayface, një nga kundërshtarët e fuqishëm të Batmanit. Aktori Tom Rhys Harries do ta interpretojë personazhin në një film me elemente horror, i cili do të tregojë transformimin e tij nga një yll në ngritje në një përbindësh që mund të ndryshojë formën.

Edhe pse Batman nuk pritet të shfaqet drejtpërdrejt në këtë histori, atmosfera e Gotham City dhe referencat e mundshme ndaj superheroit mund ta mbajnë të pranishëm në sfond.

Filmi “Clayface” është pjesë e universit të ri të DC Studios dhe pritet të dalë në kinema më 23 tetor 2026.