Calvin Harris ka hyrë në Librin Guinness të Rekordeve pasi rreth 1.6 milionë njerëz u mblodhën në São Paulo të Brazilit për performancën e tij më 8 shkurt. Koncerti u zhvillua në Rua da Consolação, ku rrugët u shndërruan në një pistë gjigante vallëzimi. Harris vendosi rekordin për audiencën më të madhe në një set DJ nga një artist i vetëm, duke interpretuar hite si “This Is What You Came for”, “One Kiss” dhe “We Found Love”.

Kjo nuk është arritja e parë e Harrisit në Guinness. Në vitin 2013, albumi i tij “18 Months” vendosi rekord pasi nëntë këngë prej tij u renditën në Top 10 të Britanisë së Madhe, duke kaluar rekordin e Michael Jackson. Artisti, emri i vërtetë i të cilit është Adam Wiles, ka pasur 11 këngë numër një në Britani dhe katalogu i tij muzikor ka tejkaluar 56 miliardë transmetime.