Komisioni Federal i Tregtisë i SHBA-së (FTC) dhe një grup dypartiak nga 22 shtete kanë paditur Amazonin, duke e akuzuar kompaninë se ka manipuluar ankandet online për reklama dhe u ka ngarkuar më shumë se ç’duhej mbi një milion reklamuesve.

Sipas padisë, Amazon mund të ketë përfituar rreth 20 miliardë dollarë që nga viti 2019 përmes kësaj praktike.

Autoritetet amerikane pretendojnë se Amazon ka zëvendësuar rezultatet reale të ankandeve me çmime më të larta të përcaktuara nga kompania, duke rritur kështu fitimet nga reklamat.

Amazon i ka mohuar akuzat, duke e cilësuar padinë si të pabazuar. Kompania thotë se FTC e keqkupton mënyrën se si funksionojnë ofertat e reklamuesve.

Sipas padisë, kostot shtesë mund të kenë ndikuar edhe te konsumatorët, pasi shpenzimet e reklamimit mund të reflektohen në çmimet e produkteve.

Pas publikimit të padisë, aksionet e Amazonit ranë me 2.5% gjatë së hënës.

Amazon ka pasur edhe më herët përplasje me FTC-në. Vitin e kaluar, kompania u pajtua të paguante 2.5 miliardë dollarë për të mbyllur një rast lidhur me regjistrimin e konsumatorëve në Amazon Prime pa pëlqimin e tyre dhe vështirësitë për anulimin e abonimit.