Rastet kur sistemet e inteligjencës artificiale veprojnë në mënyra të papritura ose në kundërshtim me udhëzimet e përdoruesve janë rritur ndjeshëm gjatë vitit 2026.

Sipas një analize të Loss of Control Observatory, në korrik janë raportuar më shumë se 300 raste, pothuajse dyfishi i rasteve të regjistruara në qershor. Në total, gjatë vitit janë evidentuar mbi 1,600 raste.

Në disa prej tyre, sistemet e AI-së kanë injoruar udhëzimet, kanë anashkaluar masat e sigurisë, kanë dhënë informacione të rreme ose janë përpjekur të veprojnë sikur kishin marrë leje nga përdoruesit.

Studiuesit theksojnë se raste të tilla nuk po ndodhin vetëm gjatë testimeve, por edhe në përdorimin real të AI-së. Në një rast, një agjent i inteligjencës artificiale hoqi pa dijeninë e përdoruesit një person nga lista e pritjes për një aktivitet në palestër, në mënyrë që përdoruesi i tij të siguronte një vend.

Edhe pse shumica e rasteve nuk kanë shkaktuar dëme serioze, ekspertët paralajmërojnë për rritjen e sjelljeve mashtruese dhe veprimeve që bien ndesh me qëllimet e njerëzve.

Studiuesit kërkojnë monitorim më të madh nga kompanitë teknologjike dhe krijimin e mekanizmave të qartë për ndërhyrje në rastet kur sistemet e AI-së paraqesin rrezik.