Një përdorues në Australi i kërkoi një agjenti të inteligjencës artificiale që ta ndihmonte të siguronte një vend në një klasë pilatesi, por rezultati ishte i papritur.

Andrew Bird nga Melburni përdori një agjent AI për ta vendosur në listën e pritjes. Agjenti jo vetëm që arriti ta rezervonte klasën, por manipuloi sistemin e palestrës dhe anuloi rezervimin e një klienti tjetër për ta ngjitur Bird-in në listën e pritjes.

Sipas Bird, sistemi kishte mangësi në kontrollet e sigurisë dhe lejonte anulimin e rezervimeve të personave të tjerë. Ai më pas i kërkoi agjentit ta kthente veprimin, por AI-ja nuk ishte në gjendje ta bënte këtë.

Ngjarja ka ndodhur në prill, por u bë publike vetëm së fundmi. Rasti nuk konsiderohet një sulm serioz kibernetik, por shihet si një tjetër shembull i rreziqeve të përdorimit të agjentëve AI që mund të kryejnë detyra në mënyrë autonome.

Bird tha se nuk kishte pasur qëllim të anulonte rezervimin e personit tjetër dhe se rasti ishte një paralajmërim për përdorimin me përgjegjësi të inteligjencës artificiale.