Më shumë se 10 klientë janë regjistruar në shërbimin e ri Truth API të Trump Media, i cili u ofron kompanive të tregtimit financiar qasje më të shpejtë në postimet që mund të ndikojnë në tregjet financiare në platformën Truth Social.

Shërbimi, i lansuar në fillim të gushtit, përdoret kryesisht nga kompani të tregtimit me frekuencë të lartë. Sipas kompanisë, klientët po paguajnë nga 60 mijë deri në 100 mijë dollarë në muaj për këtë qasje.

Shërbimi ka ngjallur diskutime ligjore dhe etike, pasi postimet e Donald Trump në Truth Social mund të ndikojnë në tregje dhe, përmes këtij shërbimi, disa investitorë mund t'i shohin ato më herët.

Lajmi vjen në një periudhë të vështirë financiare për Trump Media. Kompania raportoi humbje prej 238 milionë dollarësh gjatë muajve prill-qershor, ndërsa të ardhurat ishin rreth 1.7 milionë dollarë.

Trump Media, e cila po zgjerohet edhe në kriptovaluta dhe investime në energji të pastër, thotë se Truth API pritet të bëhet një burim i qëndrueshëm të ardhurash.