Ministria e Infrastrukturës dhe Transportit ka njoftuar se sot do të zbatohet kufizim i përkohshëm i qarkullimit për automjetet e transportit të mallrave me masë totale mbi 20 tonë në autoudhët e Kosovës.

Kufizimi do të jetë në fuqi nga ora 11:00 deri në 17:30, pasi temperaturat pritet të kalojnë 32 gradë Celsius.

Nga ky vendim përjashtohen automjetet e policisë, shërbimeve emergjente dhe institucioneve shëndetësore.

Ministria u bën thirrje operatorëve ekonomikë dhe drejtuesve të këtyre automjeteve që të respektojnë kufizimin dhe të planifikojnë qarkullimin sipas orarit të përcaktuar.

Ndërkohë, në rrugët nacionale, rajonale dhe lidhëse, qarkullimi i automjeteve mbi 20 tonë do të vazhdojë pa kufizime.